O proxecto Samieira en Imaxes
Samieira en Imaxes é un proxecto colaborativo de valorización do patrimonio local mediante a recompilación de arquivos multimedia, a dixitalización de álbums fotográficos familiares e a súa proxección nun espazo web. Forma parte da iniciativa Samieira Dixital, un espazo na rede, de información e actualidade, que busca destacar os valores históricos, culturais e medioambientais de Samieira, unha localidade situada na beira norte da ría de Pontevedra de gran valor patrimonial e paisaxístico.
Quen pode participar neste proxecto?
Calquera. Samieira en Imaxes é un proxecto aberto, mantido por cidadáns, no que calquera persoa que o desexe pode colaborar. Varias persoas están xa a traballar de xeito altruista nesta iniciativa.Por que é importante a túa contribución?
A túa participación é moi importante xa que este proxecto non recibe financiación de ningún tipo nin tampouco apoio de carácter institucional.
Tamén podes colaborar na mellora do sitio enviando avisos de erros, grallas ou defectos de funcionamento.
Como podo participar?
Podes participar enviando arquivos ou suxestións: buscamos fotografías modernas e antigas, arquivos audiovisuais e outros documentos gráficos da localidade (debuxos, planos antigos, etc...) co fin de expolos de xeito accesible neste espazo dixital para que todos/as podan gozar dos mesmos.Tamén podes colaborar na mellora do sitio enviando avisos de erros, grallas ou defectos de funcionamento.
Quen ten a propiedade dos contidos?
Samieira en Imaxes só exhibe obras propias, públicas ou cedidas. Actúa únicamente como divulgador das mesmas ofrecendo un espazo para o seu coñecemento. O proxecto garante en todo caso o recoñecemento da autoría das obras. Como autor/a sempre manterás intactos os teus dereitos sobre ela/s e en calquera momento, ademáis, poderás retirala/s se é o teu desexo.
Como envío os arquivos?
Se queres contribuír á construción deste espazo podes empregar o formulario de contacto da páxina ou o enderezo electrónico: samieiradixital@gmail.com. Samieira en Imaxes pon ao teu dispor a infraestrutura humana e tecnolóxica para que podas dar a coñecer os teus traballos audiovisuais. Xunta nun único lugar o esforzo de todos/as xerando con iso un fermoso álbum colectivo.
Que outras formas hai de apoiar o proxecto?
Divulgándoo, axudándonos a difundilo, compartíndoo no teu blog ou espazo web para que outras persoas podan disfrutar dos seus contidos. Tamén mediante a participación nas redes sociais. Publicamos cada nova incorporación a este catálogo audiovisual no facebook da iniciativa Samieira Dixital.PARTICIPAR |
IR A FACEBOOK |